ނޫރު މަދަހަ މުބާރާތުގެ ތިންވަނަ ސީޒަންގެ އެއްވަނަ ފާތިމަތު ތޫބާ ހޯދައިފި

ހއ. މޮޅަދޫ ކައުންސިލާއި، އެ ރަށު އަންހެނުންގެ ތަރައްޤީއަށް މަސައްކަތްކުރާ ކޮމިޓީ އަދި މޮޅަދޫ ސްކޫލް ގުޅިގެން ބޭއްވި "ނޫރު މަދަހަ މުބާރާތް" ސީޒަން 3 ގެ ފަޚުރުވެރި އެއްވަނަ ފާތިމަތު ތޫބާ ހޯދައިފިއެވެ. މި މުބާރާތުގެ އެއްވަނަ ތޫބާ ހޯދާފައިވަނީ މުބާރާތުގެ ގަދަ 10 ބައިވެރިންގެ މެދުގައި ރޭ މޮޅަދޫ ސްކޫލްގައި ކުރިޔަށް ގެންދިޔަ ފައިނަލް ރައުންޑުގައި ވާދަކޮށް އެންމެ ރަނގަޅު ނަތީޖާ ހޯދައިގެންނެވެ. މުބާރާތުގެ އެއްވަނަ ހޯދި ތޫބާއަށް އިނާމެއްގެ ގޮތުގައި 6،000 ރުފިޔާގެ ފައިސާގެ އިނާމާއި އުމުރާ ދަތުރެއް ވަނީ ދީފައެވެ. މި މުބާރާތުން ދެވަނަ ހޯދާފައިވަނީ ސަރާ އަހްމަދު ޖިނާހްއެވެ. އޭނާއަށް 3،000 ރުފިޔާގެ ފައިސާގެ އިނާމެއް ދީފައިވާއިރު، މުބާރާތުން ތިންވަނަ ހޯދި ހައްވާ ޝިއުފާ ހުސައިންއަށް ވަނީ 2،000 ރުފިޔާގެ ފައިސާގެ އިނާމެއް ދީފައެވެ. މޮޅަދޫ ސްކޫލްގައި ރޭ ބޭއްވި މި މުބާރާތުގެ ފައިނަލް ރައުންޑް އަދި ނަތީޖާ ފާޅުކުރުމުގެ ރަސްމިއްޔާތު ޝަރަފްވެރި ކޮށްދެއްވީ ހއ. މުރައިދޫ ކައުންސިލްގެ ރައީސް ޢަލީ ސިނާންއެވެ. މިއީ  މި މުބާރާތް ބޭއްވި ތިންވަނަ އަހަރެވެ. މިއަހަރުގެ މުބާރާތުގައި ޖުމްލަ 34 ބައިވެރިން ބައިވެރިވެފައިވެއެވެ.