އިހަވަން ފުޓްސަލް ޗެލެންޖްގައި ރަޖިސްޓްރީކުރުމުގެ ފުރުސަތު ހުޅުވާލައިފި!

ސީޕީއެސް ސްޕޯރޓްސް އެންޑް ރެކްރިއޭޝަން ކްލަބް “ސާކް” އިން ބާއްވާ އިހަވަން ފުޓްސަލް ޗެލެންޖްގައި ރަޖިސްޓްރީ ކުރުމުގެ ފުރުސަތު ހުޅުވާލައިފިއެވެ. މިމުބާރާތުގައި ރަޖިސްޓްރީވުމަށް ހުޅުވާލައިފައިވަނީ މިހިނގާ ޖޫން މަހުގެ 30 ވަނަ ދުވަހާއި ހަމަޔަށެވެ. އިހަވަން ފުޓްސަލް ޗެލެންޖަކީ، ސީޕީއެސް ސްޕޯރޓްސް އެންޑް ރެކްރިއޭޝަން ކްލަބްއިން 2023 ވަނަ އަހަރުން ފެށިގެން ބާއްވަމުން އައި  ބޮޑުތިލަދުންމަތި ފުޓްސަލް ޗެލެންޖް ރިބްރޭންޑްކޮށް މިއަހަރު ބާއްވާ މުބާރާތެކެވެ. ބޮޑުތިލަދުންމަތި ފުޓްސަލް ޗެލެންޖް، އިހަވަން ފުޓްސަލް ޗެލެންޖަށް ރިބްރޭންޑް ކޮށްފައިވާއިރު، ގެނެސްފައިވާ އެންމެ ބޮޑު ބަދަލަކީ، މިމުބާރާތް ހއ އަތޮޅަށް ހާއްސަ ކޮށްފައިވުމެވެ. ބޮޑުތިލަދުންމަތި ފުޓްސަލް ޗެލެންޖް، ކުރިން އާމާޒް ކޮށްފައި އޮންނަނީ ހއ، ހދ އަދި ށ އަތޮޅުގެ ރަށްތަކަށެވެ. އިހަވަން ފުޓްސަލް ޗެލެންޖްގައި ރަޖިސްޓްރީވުމުގެ ފުރުސަތު ހުޅުވާލައިފާވަނީ ސާކްގައި ރަޖިސްޓްރީ ކޮށްފައިވާ އިހަވަންދޫގެ ޓީމް ތަކަށާއި، ރަށު ކައުންސިލް ތަކަށާއި، ރިސޯޓް ތަކުގެ އިތުރުން ކްލަބް ޖަމިއްޔާތަކަށެވެ. މިމުބާރާތުގައި ރަޖިސްޓްރީވުމުގެ ފީއަކީ 2000ރ އެވެ. އިހަވަން ފުޓްސަލް ޗެލެންޖްގެ ޗެމްޕިއަން ޓީމަށް 30،000ރ އަދި ރަނަރަޕް ޓީމަށް 7،000ރ ފައިސާގެ އިނާމެއް ހުށަހަޅާފައިވާއިރު، މިމުބާރާތް ފެށުމަށް ހަމަޖެހިފައިވަނީ ޖުލައި މަހުގެ 25 ވަނަ ދުވަހުއެވެ. ބޮޑުތިލަދުންމަތި ފުޓްސަލް ޗެލެންޖް 2023 ގައި 10 ޓީމެއް ބައިވެރިވެފައިވާއިރު އެފަހަރުގެ މުބާރާތް ކާމިޔާބުކުރީ ޔުނައިޓެޑް ޔޫތެވެ. އެންމެފަހުން ބޭއްވި ބޮޑުތިލަދުންމަތި ފުޓްސަލް ޗެލެންޖް 2024 ގައި 9 ޓީމެއް ބައިވެރިވިއިރު ޗެމްޕިއަން ޓީމަކީ އެފްސީ ބޮޑުމަގެވެ.