އެމްޕީއެލްއިން އިހަވަންދޫ ކައުންސިލަށް ކެރޭނެއް ހަދިޔާކުރަނީ

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހއ. އިހަވަންދޫ ކައުންސިލަށް ކެރޭނެއް ހަދިޔާކުރަން ނިންމައިފިއެވެ. މި ކެރޭން ވަނީ އިއްޔެ ހަވީރު އިހަވަންދޫއަށް ގެނެސްފައެވެ. އަދި މާދަމާ ހަވީރު ބޭއްވުމަށް ހަމަޖެހިފައިވާ ހަފުލާއެއްގައި ކެރޭން ކައުންސިލާ ހަވާލުކުރުމަށް ވަނީ ހަމަޖެހިފައެވެ. އިހަވަންދޫ ކައުންސިލް މެމްބަރު މުހައްމަދު ޒާހިރު ހަސަން މި ނޫހަށް މަޢުލޫމާތު ދެއްވިގޮތުގައި، މި ކެރޭން ވަނީ 5 އަހަރުގެ މުއްދަތަށް އެމްޕީއެލްއިން ހަދިޔާކުރަން ނިންމައިފައެވެ. އޭނާ ވިދާޅުވިގޮތުގައި، މި ކެރޭނުގެ ސަބަބުން ގިނަގުނަ ފަސޭހަތަކެއް ލިބިގެން ދާނެއެވެ. އެގޮތުން ކެރޭން ބޭނުންކުރާނީ ކައުންސިލްގެ ބޭނުންތަކަށާއި ރައްޔިތުނާއި ވިޔަފާރިތަކުގެ  ބޭނުންތަކަށް ކުއްޔަށް ދޫކުރުމަށެވެ. އިހަވަންދޫ ކައުންސިލުން ކެރޭނެއް ގަތުމަށް ދެ ފަހަރު އިޢުލާނުކުރިއެވެ. ނަމަވެސް އެކަމަށް އެކަށީގެންވާ ތަރުހީބެއް ނުލިބުނުވެ. އިހަވަންދޫ ކައުންސިލުން އެމްޕީއެލްއާއި އެކު ކުރެވުނު މަޝްވަރާއިން ކައުންސިލަށް ކެރޭނެއް ހަދިޔާކުރާއިރު، ޒާހިރު ވިދާޅުވިގޮތުގައި، ބޮޑެތި މަރާމާތުތަކާއި ޓެކްނިކަލް ކަންކަމުގައި އެމްޕީއެލްގެ އެހީތެރިކަން ލިބޭނެއެވެ. އަދި އަދި ކެރޭން އޮޕަރޭޓްކުރާނެ ޑްރައިވަރުން ތަމްރީނު ކުރުމަށްޓަކައި އެމްޕީއެލްގެ ޑްރައިވަރެއް 1 މަހުގެ މުއްދަތަށް އިހަވަންދޫއަށް ފޮނުވާފައިވާކަމަށްވެސް ޒާހިރު ވިދާޅުވިއެވެ.