ކެރޭން އޮޕަރޭޓްކޮށްގެން ލިބޭ އާމްދަނީގެ %100 ލިބޭނީ ކައުންސިލަށް : ސޮބާހް

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހއ. އިހަވަންދޫ ކައުންސިލަށް ހަދިޔާކޮށްފައިވާ ކެރޭން އޮޕަރޭޓް ކޮށްގެން ލިބޭ އާމްދަނީގެ %100 ލިބޭނީ އިހަވަންދޫ ކައުންސިލަށް ކަމަށް، އިހަވަންދޫ ކައުންސިލްގެ ރައީސް އަހްމަދު ސޮބާހް ވިދާޅުވެއްޖެއެވެ. ސޮބާހް މިހެން ވިދާޅުވީ މިރޭ ސޯޝަލް މީޑިޔާގައި ކުރެއްވި ޕޯސްޓެއްގައެވެ. ސޮބާހް އިތުރަށް ވިދާޅުވީ ކެރޭނަކީ، ވިޔަފާރިވެރިންނާއި މުޅި ރައްޔިތުންނަށް ލިބިގެން ދިޔަ ލުއިފަސޭހަކަމެއްކަމަށާ، ކައުންސިލަށް އާމްދަނީ ހޯދުމަށް ކުރެވުނު ބޮޑު އިންވެސްޓްމެންޓެއްކަމުގައެވެ. އެމްޕީއެލް އިން ކެރޭން ހަދިޔާކުރުމުން، ރަށަށްޓަކައި އުފާކޮށް އަގުވަޒަންކޮށް ޝުކުރު އަދާކުރަން ޖެހޭކަން ފާހަގަކުރައްވައި 'ތެދު' ވާހަކަދައްކަން ސޮބާހް އިރުޝާދު ދެއްވިއެވެ. ބެލެވޭގޮތުގައި ސޮބާހް އިޝާރާތް އެކުރެއްވީ، ކެރޭން އޮޕަރޭޓްކޮށްގެން ލިބޭ އާމްދަނީއިން ބައެއް އެމްޕީއެލްއަށް ދޭންޖެހޭކަމަށް ބުނެ ބައެއްފަރާތްތަކުން ވާހަކަދައްކާތީކަމަށް ބެލެވެއެވެ. އެމް.ޕީ.އެލްއިން  އިހަވަންދޫ ކައުންސިލަށް ހަދިޔާކުރީ “KOBELCO” ބްރޭންޑްގެ 25 ޓަނުގެ ކެރޭނެކެވެ. މައުލޫމާތު ލިބިފައިވާ ގޮތުގައި މި ކެރޭން ކައުންސިލާއި ހަވާލުކޮށްފައިވަނީ 5 އަހަރު ދުވަހުގެ މުއްދަތަކަށެވެ. ކެރޭން އިހަވަންދޫ ކައުންސިލާއި ހަވާލުކޮށްފައިވަނީ އިއްޔަ މެންދުރުފަހު ބޭއްވި ރަސްމިއްޔާތެއްގައެވެ. އެމްޕީއެލްއިންވަނީ ކެރޭން އޮޕަރޭޓްކުރާނެ ޑްރައިވަރުން ތަމްރީންކުރުމަށް 1 މަސް ދުވަހަށް އެމްޕީއެލްގެ މުވައްޒަފެއް ފޮނުވާފައެވެ.  އިހަވަންދޫ ކައުންސިލުން ކެރޭނެއް ގަތުމަށް ދެ ފަހަރު އިޢުލާނުކުރިއެވެ. ނަމަވެސް އެކަމަށް އެކަށީގެންވާ ތަރުހީބެއް ނުލިބުނުވެ.